షేక్ హసీనా కోసం ఇంటర్ పోల్ సాయం కోరిన బంగ్లాదేశ్ తాత్కాలిక ప్రభుత్వం

బంగ్లాదేశ్ మాజీ ప్రధాని షేక్ హసీనాను స్వదేశానికి రప్పించేందుకు ఆ దేశ తాత్కాలిక ప్రభుత్వం తన ప్రయత్నాలను ముమ్మరం చేసింది. ప్రస్తుతం భారత్‌లో ఆశ్రయం పొందుతున్న హసీనాను అప్పగించాలంటూ ఇప్పటికే పలుమార్లు భారత్‌ను కోరిన బంగ్లాదేశ్... తాజాగా అంతర్జాతీయ పోలీసు సంస్థ (ఇంటర్‌పోల్) సహాయాన్ని అర్థించింది. హసీనాతో పాటు మరో 11 మందిపై రెడ్ కార్నర్ నోటీసులు జారీ చేయాలని బంగ్లాదేశ్ ఇంటర్‌పోల్‌కు విజ్ఞప్తి చేసినట్లు సమాచారం.

గతేడాది ఆగస్టులో బంగ్లాదేశ్‌లో తీవ్ర హింసాత్మక ఘటనలు చెలరేగిన నేపథ్యంలో షేక్ హసీనా ప్రధాని పదవి నుంచి వైదొలగి, పొరుగున ఉన్న భారతదేశానికి వచ్చారు. అప్పటి నుంచి ఆమె ఇక్కడే ఉంటున్నారు. ఆమె అధికారం కోల్పోయిన తర్వాత, కొత్తగా ఏర్పడిన మహ్మద్ యూనస్ నేతృత్వంలోని తాత్కాలిక ప్రభుత్వం హసీనాపై వందలాది కేసులు నమోదు చేసింది. ఈ కేసుల్లో విచారణ నిమిత్తం ఆమెను తమకు అప్పగించాలని బంగ్లాదేశ్ దర్యాప్తు సంస్థలు, న్యాయస్థానాలు కోరుతున్నాయి.

ఈ క్రమంలోనే, బంగ్లాదేశ్ నేషనల్ సెంట్రల్ బ్యూరో (ఎన్సీబీ) తాజాగా ఇంటర్‌పోల్‌ను ఆశ్రయించినట్లు అక్కడి స్థానిక మీడియా కథనాలు వెల్లడించాయి. మాజీ ప్రధాని షేక్ హసీనాతో పాటు పలువురు మాజీ క్యాబినెట్ మంత్రులు, సలహాదారులు, సైనిక, పౌర అధికారులతో కలిపి మొత్తం 12 మందిపై రెడ్ కార్నర్ నోటీసులు జారీ చేయాలని బంగ్లాదేశ్ కోరినట్లు ఆ కథనాలు పేర్కొన్నాయి.

అంతకుముందు, బంగ్లాదేశ్ అంతర్జాతీయ నేరాల ట్రిబ్యునల్ (ICT), షేక్ హసీనాతో పాటు పలువురు ఉన్నతాధికారులపై 'మానవత్వానికి వ్యతిరేకంగా నేరాలు మరియు మారణహోమం' వంటి తీవ్రమైన అభియోగాల కింద అరెస్ట్ వారెంట్లు జారీ చేసింది. ఈ వారెంట్ల నేపథ్యంలోనే, హసీనాను భారత్ నుంచి తిరిగి బంగ్లాదేశ్‌కు తీసుకురావడానికి తాత్కాలిక ప్రభుత్వం దౌత్యపరమైన మార్గాలతో పాటు ఇప్పుడు అంతర్జాతీయ సంస్థల జోక్యాన్ని కూడా కోరుతోంది. హసీనాను అప్పగించే విషయంలో భారత్ వైఖరి ఎలా ఉంటుందనేది ప్రస్తుతం ఆసక్తికరంగా మారింది.